វីតាល់និងមីជាតិ៖ ចាក់វ៉ាក់សាំងកូវីដ-១៩ដើម្បីការពារខ្លួន គ្រួសារ និងសហគមន៍
ក្រុមហ៊ុនទឹកពិសាវីតាល់ និងក្រុមហ៊ុនមីជាតិ ក្រោមការគាំទ្រពីប្រមុខរាជរដ្ឋាភិបាលកម្ពុជាតាមរយៈក្រសួងការងារ និងបណ្តុះបណ្តាលវិជ្ជាជីវៈ និងក្រសួងសុខាភិបាល ព្រមទាំងមានការជ្រោមជ្រែងពីគណៈកម្មការចំពោះកិច្ចចាក់វ៉ាក់សាំងកូវីដ-១៩ក្នុងក្របខណ្ឌទូទាំងប្រទេស បានរៀបចំយុទ្ធនាការចាក់វ៉ាក់សាំងការពារជំងឺកូវីដ-១៩ ជូនបុគ្គលិក កម្មករ កម្មការនីនៃក្រុមហ៊ុនទឹកពិសាវីតាល់ និងក្រុមហ៊ុនមីជាតិ ប្រមាណ២០០០នាក់នៅមណ្ឌលចាក់វ៉ាក់សាំងវីតាល់ នៅថ្ងៃទី១២ ខែមេសា ឆ្នាំ២០២១ ពីម៉ោង ៧.០០ព្រឹក ដល់ម៉ោង ៦.៣០ល្ងាច។
ការចាក់វ៉ាក់សាំងនេះ បានរៀបចំឡើងក្នុងគោលបំណងដើម្បីបង្ការ និងទប់ស្កាត់ការឆ្លងរីករាលដាលជំងឺកូវីដ-១៩ និងធានាឱ្យបាននូវសុខភាព សុខុមាលភាព និងសុវត្ថិភាពជូនដល់បុគ្គលិក កម្មករ និងកម្មការីរោងចក្រ។ ដំណើរការនៃការផ្តល់វ៉ាក់សាំងបានប្រព្រឹត្តទៅដោយមានការប្រតិបត្តិ ត្រួតពិនិត្យ និងណែនាំដោយក្រសួងការងារ និងបណ្តុះបណ្តាលវិជ្ជាជីវៈ និងក្រសួងសុខាភិបាលយ៉ាងម៉ត់ចត់។
លោក ឡាវ វ៉ាន់ នាយកគ្រប់គ្រងក្រុមហ៊ុនវីតាល់ និងមីជាតិ បានមានប្រសាសន៍ថា “ក្រុមហ៊ុនយើងពិតជាមានភាពសោមនស្សរីករាយជាពន់ពេកដែលទទួលបានការអនុញ្ញាតរៀបចំមណ្ឌលសម្រាប់ចាក់វ៉ាក់សាំងជូនបងប្អូនបុគ្គលិក កម្មករ កម្មការិនី ចំណុះក្រុមហ៊ុនយើងទាំងអស់គ្នា នូវចំនួនប្រមាណ ២០០០នាក់។”
លោក ឡាវ វ៉ាន់ បានបន្តថា “ការចាក់វ៉ាក់សាំងនេះ គឺជាការស្ម័គ្រចិត្តពីបុគ្គលិក និងបងប្អូនកម្មករកម្មការនីនៃរោងចក្រយើង ដើម្បីការពារសុវត្ថិភាពខ្លួនយើង សុវត្ថិភាពគ្រួសារយើង សុវត្ថិភាពមិត្តភ័ក្តិយើង និងធ្វើឲ្យសង្គមជាតិយើងវិលទៅប្រក្រតីភាពវិញ។” លោកបាន បញ្ជាក់ថា “ការចាក់វ៉ាក់សាំងនេះ ពិតជាមិនអាចទៅរួចនោះទេ ប្រសិនបើគ្មានការខិតខំប្រឹងប្រែងពីប្រមុខរាជរដ្ឋាភិបាលក្នុងការទទួលនូវវ៉ាក់សាំង។”
តំណាងកម្មកររោងចក្រ បានមានចំណាប់អារម្មណ៍ថា “ខ្ញុំពិតជាមានសេចក្តីត្រេយអរជាខ្លាំង ដែលបានចាក់វ៉ាក់សាំងនៅថ្ងៃនេះ។ ហើយមិនត្រឹមតែខ្ញុំម្នាក់នោះទេ តែបងប្អូនកម្មករដទៃក៏មិនខុសគ្នានោះដែរ។ យើងបានចាក់វ៉ាក់សាំងរួចជាស្រេច។” គាត់បានបន្តថា “ខ្ញុំសូមអរគុណដល់ក្រុមហ៊ុនក្នុងការរៀចំកម្មវិធីនេះឡើង និងសូមថ្លែងអំណរគុណដល់ក្រសួង និងរាជរដ្ឋាភិបាលក្នុងការផ្តល់វ៉ាក់សាំងឲ្យពួកយើងចាក់នៅថ្ងៃនេះ។”
លោក ឡាវ វ៉ាន់ បានអំពាវនាវដល់ប្រជាពលរដ្ឋយើងទាំងអស់ចូលរួមចាក់វ៉ាក់សាំង និងយកចិត្តទុកដាក់ចំពោះសុខភាព ដោយពាក់ម៉ាស់ឲ្យបានត្រឹមត្រូវ លាងដៃឲ្យបានស្អាត និងរក្សាគម្លាតទំនាក់ទំនង ដើម្បីការពារខ្លួន ការពារក្រុមគ្រួសារ និងការពារសហគមន៍យើងពីការឆ្លងជំងឺកូវីដ-១៩។ ជាពិសេសក្នុងឱកាសពិធីបុណ្យចូលឆ្នាំខាងមុខនេះ សូមបងប្អូនប្រុងប្រយ័ត្ន និងសូមនៅផ្ទះ។”
យោងតាមក្រសួងការងារ និងបណ្តុះបណ្តាលវិជ្ជាជីវៈ ប្រមុខរាជរដ្ឋាភិបាល បានផ្តល់វ៉ាក់សាំងចំនួន២០ម៉ឺនដូស ដើម្បីចាក់ជូនបងប្អូនកម្មករ និយោជិតនៅរាជធានីភ្នំពេញក្នុងខែមេសានេះ។ បន្ទាប់ពីរាជធានីភ្នំពេញ ការចាក់វ៉ាក់សាំងនឹងបន្តជូនបងប្អូនកម្មករ និយោជិតនៅខេត្តកណ្តាល ព្រោះខេត្តនេះមានភាពប្រទាក់ក្រឡាគ្នា មានការចេញចូលចម្រុះ និងជាស្នូលនៃមជ្ឈមណ្ឌលពាណិជ្ជកម្ម។ ខេត្តព្រះសីហនុ ខេត្តស្វាយរៀង និងខេត្តតាកែវ ជាខេត្តគោលដៅដែលបានកំណត់ជាខេត្តអាទិភាពបន្ទាប់ពីរាជធានីភ្នំពេញ និងខេត្តកណ្តាល។
